Electric Aircraft : విమానయానంలో కొత్త శకం: ప్రయాణికులతో తొలి ఎలక్ట్రిక్ విమానం:విమానయాన రంగంలో ఒక కొత్త అధ్యాయం మొదలైంది! అమెరికాకు చెందిన బీటా టెక్నాలజీస్ అభివృద్ధి చేసిన ‘ఆలియా సీఎక్స్300’ అనే పూర్తి ఎలక్ట్రిక్ విమానం పర్యావరణానికి హాని చేయని, చౌక ప్రయాణాలకు మార్గం సుగమం చేస్తూ చరిత్ర సృష్టించింది.
అద్భుతం. కేవలం ₹694కే 130 కిలోమీటర్ల ప్రయాణం
విమానయాన రంగంలో ఒక కొత్త అధ్యాయం మొదలైంది! అమెరికాకు చెందిన బీటా టెక్నాలజీస్ అభివృద్ధి చేసిన ‘ఆలియా సీఎక్స్300’ అనే పూర్తి ఎలక్ట్రిక్ విమానం పర్యావరణానికి హాని చేయని, చౌక ప్రయాణాలకు మార్గం సుగమం చేస్తూ చరిత్ర సృష్టించింది. ఇటీవల ప్రయాణికులతో విజయవంతంగా గాల్లో ప్రయాణించి, భవిష్యత్ విమానయాన రూపురేఖలను మార్చే దిశగా ఇది ఒక కీలకమైన ముందడుగు వేసింది.
అమెరికా గగనతలంలో ఒక అద్భుతం జరిగింది. వెర్మాంట్ కేంద్రంగా పనిచేస్తున్న బీటా టెక్నాలజీస్ సంస్థ రూపొందించిన ‘ఆలియా సీఎక్స్300’ ఎలక్ట్రిక్ విమానం, నలుగురు ప్రయాణికులతో తన తొలి వాణిజ్య ప్రయాణాన్ని విజయవంతంగా పూర్తి చేసింది. న్యూయార్క్ పోర్ట్ అథారిటీ పరిధిలోని ఈస్ట్ హాంప్టన్ నుంచి జాన్ ఎఫ్ కెన్నడీ (జేఎఫ్కే) అంతర్జాతీయ విమానాశ్రయం వరకు సాగిన ఈ ప్రయాణం, విమానయాన చరిత్రలో ఒక మైలురాయిగా నిలిచింది. ఈ విజయం, పట్టణ మరియు ప్రాంతీయ ప్రయాణాల్లో విప్లవాత్మక మార్పులకు నాంది పలికిందని నిపుణులు అభివర్ణిస్తున్నారు.
ఈ చారిత్రాత్మక ప్రయాణంలో అత్యంత ఆకర్షణీయమైన విషయం దాని ఖర్చు. సుమారు 130 కిలోమీటర్ల దూరాన్ని కేవలం 30 నిమిషాల్లో అధిగమించిన ఈ విమానానికి అయిన ఇంధన (విద్యుత్) ఖర్చు కేవలం 8 అమెరికన్ డాలర్లు. ఇది మన భారత కరెన్సీలో సుమారు 694 రూపాయలు మాత్రమే! ఇదే దూరాన్ని హెలికాప్టర్లో ప్రయాణించాలంటే కేవలం ఇంధనానికే 160 డాలర్లకు పైగా (సుమారు 13,000 రూపాయలు) ఖర్చవుతుందని అంచనా. “ఈ విమానాన్ని ఛార్జ్ చేసి ఇక్కడికి తీసుకురావడానికి మాకు సుమారు 8 డాలర్లు ఖర్చయింది,” అని బీటా టెక్నాలజీస్ వ్యవస్థాపకుడు, సీఈఓ కైల్ క్లార్క్ ఉద్ఘాటించారు. పైలట్, నిర్వహణ ఖర్చులు అదనమే అయినా, ఇది అత్యంత చౌక ప్రత్యామ్నాయం అని ఆయన స్పష్టం చేశారు.
